Pawngsualtua puh Meghalaya MLA hlui kum 25 tang turin hrem

Meghalaya-a POCSO court chuan MLA hlui, Julius Dorphang chu kum 2017-a hmeichhe kum tling lo pawngsuala puhna thubuaiah thiam loh chantirin kum 25 tang turin a hrem.

Julius Dorphang hremna hi Protection of Children from Sexual Offences (POCSO) special judge FS Sangma chuan a puang a ni. Mahse Dorphang-a aiawhte chuan he thutlukna hi Meghalaya High Court-ah an khing leh dawn tih an sawi.

Hynniewtrep National Liberation Council (HNLC) helpawl hruaitu hlui, Dorphang hi kum 2007 khan police kutah a inpe a, kum 2013 state assembly inthlanah khan Ri-Bhoi district-a Mawahati bialah chuhin MLA atan thlan tlin a ni. MLA a nih lai, kum 2017 khan hmeichhe kum 14 mi pawngsualah puh a ni a, hemi hian Dorphang hi bibo zuiin a hnuah Guwahati-ah man a ni. Protection of Children from Sexual Offences (POCSO) Act leh Immoral Trafficking Prevention Act hnuaiah thubuai siamsak nghal a ni.

Nongpoh district jail-ah dah niin, kum 2020 khan Meghalaya High Court bench chuan medical lam thil avangin bail-in a chhuah. Kumin August 13 khan man nawn leh niin, POCSO court-ah a thubuai hi a ngaihtuahin thiam loh chantir a ni ta a ni.