Assam-ah Bodo hel 60 inpe

Assam-a helpawl thar, National Liberation Front of Bodoland (NLFB) member 60 vel chu Thawhlehni khan Udalguri district-ah an ralthuam neihte nen police-te kutah an inpe tih official chuan a sawi.

Hel inpete hi Udalguri police station hnuaia Sonai Khowrang area-a camp-ah dah an ni.

Assam police senior official chuan helte hian ralthuam AK-56 rifle pariat, SLR pahnih leh a magazine, homemade pipe gun pali leh gunpower bur pathum, HE-36 hand grenade panga leh detonator, F228 pistol pakhat leh magazine, 7.61mm pistol pahnih leh magazine, 7.65mm pistol pakhat leh magazine bakah silai mu eng emaw zat an thehlut tih a sawi.

Tun ṭum hi thla khat chhunga NLFB hel inpek ṭum ngana a ni. An pawl hotu lu ber, M Batha leh member 150 vel chu sorkar kutah hian an lo inpe tawh a ni.

NLFB thla rei vak lo liam taa an din a ni a, Bodoland Territorial Region (BTR)-ah an chetla ber a ni. Police-te nen an inbeihnaah an pawl member pakhat kahhlum ni tawhin, mi 27 man an ni tawh bawk.

Kum 2020, January 30-a 3rd Bodo Peace Accord ziah a nih hnu khan National Democratic Front of Bodoland (NDFB) helpawl hnuaia pawl hrang hranga member 1.615-te chu sorkar kutah inpein, NDFB pawh hi ṭhiah a ni zui nghal a ni. Inpe zingah hian M Batha pawh a tel. Mahse Accord kalpui a nih danah Batha hi lungawi loin, nikum December thlaa Bodoland Territorial Council (BTC) inthlan neih zawh hnu khan a underground leh nghal a, NLFB hi a din zui leh nghal a ni.

Chief minister Himan­ta Biswa Sarma chuan July 12 khan state Assembly-ah kum 2016 aṭangin state chhunga helpawl hrang hrang member 3,439 chu sorkar kutah an inpe tawh tih a sawi a ni.