AAPSU-in Chakma leh Hajong sawnchhuah tum thlawp

All Arunachal Pradesh Students Union (AAPSU) chuan Arunachal Pradesh sorkarin state chhunga Chakma leh Hajong raltlante state pawn lama sawnchhuah a tum chu lawmawm an tih thu an sawi.

Union general secretary Tobom Dai chuan, "Tun hnaia chief minister Pema Khandu thuchhuahin Chakma leh Hajong refugee-te state pawn lama sawnchhuah tum an nih thu a sawi chu thil chhinchhiah tlak tak a ni. Hemi atan hian AAPSU leh state mipuite chuan hun rei tak an lo bei tawh a ni," a ti.

Dai chuan kum 1964-1968 khan state chhung mipuite remtihna engmah la loin dan kalha pem lut, Chakma leh Hajong-te chu Arunachal-ah dah an nih thu a sawi. "AAPSU chuan Chakma leh Hajong-te awm ngheh tir tumna hi kawng hrang hrangin a lo dodal tawh a ni," a ti.

Union law minister Kiren Rijiju-a'n Indian constitution hnuaiah raltlan chungchanga an buaina chinfel dan ngaihtuah a nih tur thu a sawi chu lawmawm an ti hle tih Dai chuan a sawi bawk. "Chief Minister leh Union Minister-ten huaisen taka an sawi hi thil hriatreng tlak a ni. Heng an thusawi hi AAPSU leh Arunachal mipuite tan chuan thu lawmawm a ni," tiin AASPU hruaitu chuan a sawi.

Sorkar hmalak dan chu an thlir zui zel dawn tih sawiin, Dai chuan Khandu leh Rijiju thusawite a taka chantir thuai turin prime minister Narendra Modi leh union home minister Amit Shah a ngen bawk.

Union president Hawa Bagang chuan AASPU leh Arunachal mipuite chuan Chakma leh Hajong-te chu an pawm ngai dawn lo a, an ram inches khat pawh an pe dawn lo tih chiang takin an lo sawi fo tawh tih a sawi bawk a ni.

Arunachal Pradesh-ah hian Chakma leh Hajong hnam hi nuai khat chuang an awm a ni.