Mipui lungawi lote'n Meghalaya CM leh Dy CM lim an hal : Thangkhiew tan rorelna dik an phut

Meghalaya khawpui, Shillong-ah Nilaini khan Voice of the people of Mawlai (Sur Ki Nong Mawlai) chuan Hynniewtrep National Liberation Council ( HNLC) hruaitu hlui, Cheristerfield Thangkhiew thah a nih dana lungawi lohna lantir lehin, chief minister Conrad K Sangma, deputy chief minister Prestone Tynsong, home minister Lakhmen Rymbui, DGP Chandranathan, East Jaintia Hills SP Jagpal Singh Dhanao leh SP Traffic lim an hal.

Mawlai junction-ah mipuite hi punghawmin, Thangkhiew thah a nih dana an lungawi loh thu leh, rorelna dik an duh thu an sawi. August 13-a Thangkhiew kahhlum a nih laia police officer in charge-te chu suspend an phut bawk. An thil phut chungchangah hian August 18 khan CM pawh an lo hmu tawh a ni.

Hynniewtrep Youths Council (HYC) Mawlai Circle president Donboklang Kharlyngdoh chuan police-te chet dan chu an dem thu sawiin, he thila mawhphurtu police officer-te suspend tura an phut chungchanga hma an lak zui loh avangin Chief Minister leh Home Minister an dem thu a sawi.

Mawlai-a lungawi lohna lantirna hi pressure group hrang hrang pawhin an thlawp a, vawiin hian Thangkhiew puala candlelight vigil buatsaih bakah, signature campaign 'Justice First' neih an tum bawk.