Assam-Meghalaya ramriah buaina chhuak leh

Assam leh Meghalaya ramriah Nilaini khan buaina a chhuak thar leh.

Assam police-ten Meghalaya mi pathumte kut an thlak avanga lungawi loin, Meghalaya mite chuan Thawhlehni khan state pahnih inrina laia awm, Umlapher area-a police check post an lo tihchhiatsak tawh bawk. Umlapher hi Meghalaya Ri-Bhoi district leh Assam-a West Karbi Anglong district inrina laia awm a ni a, state pahnihte chuan an state china awm niin an chhal ve ve a ni.

Boruak a ziaawm tawha an ngaih hnuah, Karbi Anglong SP chuan Nilaini khan Meghalaya aṭangin police team nen civil mi 100 vel chu Umlapher-ah hian an kal leh niin a sawi a, Assam lam chin luh zel an tum chu Assam police-te chuan lo dangin an lo nawr let tih a sawi. State pahnih police-te pawh hi an inhnial buai hman a, mahse a hnuah Meghalaya lamte hi an kir leh a, boruak pawh a muanawm leh tawh niin a sawi. Hemi rual hian buaina awm leh tur venga uluk taka thil awmdan an thlithlai reng tur thu a sawi.

Hetih lai hian Umlapher-a kal, Hynniewtrep Youth Council (HYC) member chuan Umlapher-ah hian buaina siam tum ni loin, he hmuna Khasi chengte hmu tura kal an ni a, Assam mite chu buaina lo siamah a puh thung. Assam mite hian lungin an lo tawng a, an lung vawm zinga pakhat hian Ri-Bhoi DSP F Rehaman luah a fuh a ni.