Chakma leh Hajong-te kan pawm ngai lo ang : Arunachal NPP hotu

Arunchal Pradesh-a National People's Party (NPP) state president Mutchu Mithi chuan state sorkarin Arunachal aṭanga Chakma leh Hajong hnamte sawnchhuah a tum chu lawmawm a tih thu sawiin, heng hnam pahnihte hi an state-ah an pawm ngai dawn lo tih a sawi.

NPP hruaitu chuan state chhunga pawl hrang hrangte chuan Chakma leh Hajong chu Arunachal leilung fa anga an pawm dawn lo tih pawh an lo sawichiang tawh hle a ni, a ti. "Arunachal mite chuan Chakma leh Hajong-te chu khawngaih hle mah ila, kan state leilung fa angah kan pawm tihna a ni chuang lo," a ti.

Mithi chuan Chakma leh Hajong refugee-te chuan Citizenship Amendment Act (CAA) hnuaiah hmun dangah India khua leh tui nihna an dil thei a ni tiin, Arunachal Pradesh erawh chuan an tan kawng a khar tih an hriat a ṭul tih a sawi. "CAA hi Arunachal Pradesh-a hman a ni ve lo a, he dan hnuaiah khua leh tui pek theih an ni lo a, kan tum hek lo," tiin a sawi.

NPP president chuan an state-a raltlan pung zel chungchang pawh ngaihven a ngai hle tih a sawi. "Tunah hian heng raltlan awmte hi nuai 1-1.5 vel ni tawhin, Arunachal indigenous tribe ṭhenkhat ai pawhin an tam tawh zawk a, hei hi ngaihthah mai chi a ni lo. Khua leh tui nihna kan pe a nih phei chuan mihring awm zat chhuina leh state chhung inrelbawl dang thlengin a danglam dawn a ni," a ti.

Chakma leh Hajong-te hi Chittagon Hill Tract-a cheng ṭhin niin, kum 1960 chho Kaptai lui lianin an awmna ram a chim hnu khan hmun dangah an tlanchhia a ni. Hetih hun laia Assam hnuaia Lushai Hills district (Mizoram) kaltlangin India ram an lut a, mi eng emaw zat chu khawsa zuiin an zinga a tam zawk erawh chu sorkar laipuiin Arunachal Pradesh-ah hian a sawn a ni.