Meghalaya CM-in rel station-a facilitation centre a hawng

Meghalaya chief minister Conrad K Sangma chuan North Garo Hills district-a rel station-ah state chhung rawn lutte chhinchhiahna tur facilitation centre a hawng

Facility hi Mendipathar Railway Station-ah siam a ni.

CM chuan, "Facilitation centre-ah hian he station kaltlanga state chhunga rawn lutte uluk taka record zel a ni ang," a ti. Hemi hmang hian Assam leh hmun dang aṭanga an rawn luh dan chu district thuneitute chuan an enzui thei dawn a ni.

Sangma chuan Mendipathar-ah hian cheng vaibelchhe 100 sengin food park siam a ni dawn tih a sawi bawk.

Sept 1 aṭangin tourism sector hawng dawn
Chief minister Sangma chuan September 1 aṭangin state tourism sector chu hawn a ni dawn a, khualzinte tan khuahkhirhna siamte pawh thlahdul chhoh a ni dawn tih a sawi.

Covid vaccine dose la kim tawhte chu Meghalaya an tlawh phal a ni dawn a, vaccine la lo leh a dose khatna chauh la erawh chu state an luh hma darkar 72 chhungin negative Covid test report an neih a ngai thung ang. Khualzin luh phal tawhte chu state chhunga tourist destination khawi hmun pawh an tlawh phalsak an ni bawk ang.

Meghalaya sorkar chuan September 1 aṭang vekin zirna inte hawn a tum tawh bawk. CM chuan, "September 1 aṭangin college-te hawn vek an ni tawh dawn a, urban area-ah Class 9-12 hawn ni bawkin, Class 6-8 chu school visit phalsak an ni ang. Class 1-5 erawh chu online class kalpui a la ni thung ang," a ti. Rural area-ah chuan Class 6-12 hawn phal a ni dawn a, Class 1-5 chu school visit phalsak an ni bawk ang.