Tripura CM thar tur Biplab Dep

Tripura Bharatiya Janata Party (BJP) hruaitu Biplab Kumar Deb chuan naktuk aṭang hian Chief Minister office a luah rin a ni.

Biplap Dep Kumar hi Tripura Chief Minister 11-na tur niin, Tripura Assembly inthlan February 18-a neihah khan BJP hian chiang takin hnehna an chang a ni.

Union Minister Nitin Gadkari chuan Thawhlehni khan Tripura BJP President Biplap Kumar Dep chu Chief Minister thar tur a nih thu sawiin Tribal party hruaitu Jishnu Debbarma chu Deputy Chief Minister a ni dawn thung niin a sawi.

Nitin Gadkhari-a'n thuchhuah a siam hma hian BJP leh a thurualpui Indigenous People’s Front of Tripura (IPFT)-te chuan Agartala-ah meeting neiin, Chief Minister tur thutlukna hi an siam a , he hunah hian Union Tribal Affairs Minister Jual Oram leh Gadkhari-te pawh an tel ve nghe nghe a ni.

Thuchhuah an siam hnu lawkah hian Deb leh a kaihhruai BJP hruaitu ṭhenkhat chuan Raj Bhavan-ah Governor Tathagata Roy hmuin sorkarna an siam theih thu an hrilh nghal bawk.

Governor hoa darkar khat dawn meeting an neih hnuah Dep chuan Governor in Chief Minister tura a ruat tawh thu a sawi a, Zirtawpni chhun dar 12-ah Assam Rifles ground-ah lawmluhna inkhawm an neih dawn thu a sawi bawk a ni.

Hetih lai hian Deb hian a minisry len zawng tur leh IPFT lam aiawh tur te a la puangchhuak duh lo a, Prime Minister Narendra Modi, BJP President Amit Shah leh central minister eng emaw zat chu amah lakluhna inkhawmah hian an tel dawn tih a sawi bawk.

Tripura ministry hian a tam berah member 12 chiah an nei thei a, IPFT hotupa Narendra Chandra Debbarma chuan ministry thara an party aiawh tur chungchang chu Assam Minister Himanta Biswa Sarma ho in nimin khan an sawi ho dawn thu a sawi a, he thuziah lai hian thuchiang hriat hman a ni lo thung.

Biplap Kumar Dep hi kum 46 mi niin RSS volunteer a ni ṭhin a, a hnuah BJP hruaitu a ni leh ta a ni.