Nagaland CM thar atan Rio lalut dawn

Nagaland Chief Minister thar atan Neiphiu Rio chu vawiin hian rinawmna thu tiamtirin lakluh a ni dawn.

Naga People’s Front (NPF) hruaitu hlun T.R. Zeliang chuan Thawhlehni khan Nagaland Chief Miniter aṭanga banna a thehlut tawh a ni.

T.R Zeliang hian Bharatiya Janata Party (BJP) in an thawhhona hun a tawp thu an sawi hnu lawkah a banna hi a thehlut nghal a, hetih lai hian Nationalist Democratic Progressive Party (NDPP) leh a thurualpui BJP chuan Neiphiu Rio chu an ṭangrual party hruaitu ber atan Hotel Vivor, Kohima-a Thawhṭannia meeting an neihah an thlang thung.

Zeliang chuan Governor P. B. Acharya hnena lehkha a thehluhah BJP in NPF nena an inzawmna a tichat tih a hriat hnuah Council of Ministers aṭanga a ban thu ziakin a rang thei ang bera a banna pawmsak turin a ngen bawk a ni. Governor PRO pawhin Thawhlehni vel hian thuchhuah siamin TR Zeliang-a banna chu an pawm thu an sawi ve nghal bawk.

Chief Minister kalchhuak tur chuan NPF in sorkar thar tur chu an theih ang anga an thlawp dawn thu a sawi a, Naga mipui tam zawk duhdan an ngaihpawimawh a beisei thu a sawi bawk.

Zeliang chuan Naga mipui zawng zawng duhthusam chu August 3, 2015-a Naga political issue buaina chinfelna tur Framework Agreement an ziah chuan thu pawmawm tak leh zahawm tak a chhuah theihna tur a nih thu a sawi a, Nagaland-ah remna leh muanna a awm zel a beisei thu a sawi.

Nagaland CM thar tur, Rio hi Lok Sabha member hlui niin Chief Minister dinhmun pawh hi vawi thum lai a lo chelh tawh nghe nghe a, February 27-a Nagaland Assembly inthlan hma lawkah khan party thar NDPP a zawm a ni. A dinna bial Northern Angamy -II Constituency-ah chuhpuitu awm loa a tlin avangin he bialah hian inthlanna pawh an nei lo a ni.