Assam-ah Police leh mipui innek buai, mi 30 hliam
Assam-a Bodoland-ah Thawhlehni khan mipui lungawi lo leh police an innek buai a, mi 30 aia tam mahin hliam an tuar.
Mipui-te hi Bodoland Territorial Council (BTC)-ten ram teh dan chungchanga thutlukna an siam-ah an lungawi loh vangin an pungkhawm a ni.
BTC area chhunga ram teh chungchangah BTC-in thuneitu lam phalna ni loa tribal mi ni lo te tana khuahkhirh chin an siam duh lohna lantir in Kokrajhar leh Chirang district mipuite chuan bandh an huaihawt a, mipuite hian tyre leh auto-rickshaw-te an hal bawk.
Kokrajhar district-a Charaikhola area-ah kawngpuite dangin, Chirang district-a Sidli-ah National Highway 31 an dang bawk a ni.
Auro-rickshaw an halsak khalhtu Safiur Rahman chu a taksa hmun hrang hrang a kang nasa hle niin report chuan a tarlang.
Inspector General of Police (BTAD) Anurag Agarwala chuan tharum thawhna a nasat avangin mipuite hnawh darh nan police-te chuan tear gas an hman thu a sawi a, rubber bullet-te pawh an hmang bawk niin a sawi. Police-te chuan mipui chu dim taka an hnawhdarh thu sawiin, tunah chuan boruak sosang lutuk pawh an thunun tawh thu a sawi bawk.
Bodoland hi official tak chuan Bodoland Territorial Area Districts (BTAD) tih a ni a, BTC council-te kaihhruaina hnuaia awmin Bodoland Peoples’ Front (BPF), BJP hnuaia pawl pakhat kaihhruaina hnuaiah an awm leh chhawng a ni.
BRAD-ah hian Bodo-te chu Tribal pawl lian ber ni mah se tribal mi ni lo mi tam tak an awm ve bawk a ni.