Neiphiu Rio-an Rinawmna thu tiam ta

Nationalist Democratic People's Party (NDPP) hruaitu Neiphiu Rio chu nimin chaw­hma dar 11.30 khan rinawmna thu tiamtir niin Chief Minister atan official taka lakluh a ni ta. Nagaland Governor PB Acgarya chuan rinawmna thu hi tiam tirin Chief Minister thar bakah hian council minister-te a laluh tel nghal a ni.

Bharatya Janata Party (MBJP) MLA Y Pattoon pawhin deputy chief minister ni turin rinawmna thu a tiam ve nghal bawk.

Rio leh Patton bakah hian minister dang 10 pawh lakluh nghal an ni.

Neiphiu Rio lakluh in­khawmah hian BJP national president Amit Shah, Union Minister of State for Home Kiren Rijiju leh Defence Minister Nirmala Sitharaman-te an tel a, anni bakah hian Meghalaya CM thar Conrad Sangma, Arunachal Pradesh CM Pema Khandu, Assam CM Sarbanada Sonowal bakah Manipur CM N. Biren Singh-te pawh an tel bawk.

Neiphiu Rio hi Lok Sabha member hlui niin Nagaland CM pawh hi vawi thum lai a lo ni tawh a, 2003-2014 inkar khan a zawnin term thum a lo chief minister tawh a ni. Nagaland CM ni tawh zingah amah chiah hi term thum a zawna CM ni thei awmchhun a ni.

Nagaland Assembly inthlanah hian TR Zeliang-a kaihhruai NPF chu party mala seat la hnem ber ni mah se NDPP leh BJP ṭangrual-te hian seat 30 an nei phak a, JD(U) legislator pakhat bakah independent legislator pakhatin an thlawp bawk avangin sorkarna hi an siam thei ta a ni.

NDPP leh a thurualpui party-te hi 'People's Democratic Alliance' an inti dawn tih Rio chuan a lo sawi tawh bawk.

Rio hian inthlan hma lawk khan party thar NDPP hi zawmin chief ministerial candidate atan ruat nghal a ni a, Assembly inthlanah khan Northern Angamy-II consti­tuency-ah dingin he seat chuh­puitu tur hi a inhnuhdawh leh avangin inthlan ngai loin tlinga puan a ni bawk a ni.