Tripura Cabinet tharah IPFT in minister 2 nei dawn

Indigenous People’s Front of Tripura (IPFT) chuan Nilaini khan thuchhuah siamin Tripura cabinet tharah minister pahnih an neih dawn thu an sawi.

Minister an neih zat tur hi Assam minister leh North East Democratic Alliance (NEDA) chairman ni bawk Himanta Biswa Sarma hoa meeting an neih hnuah thutlukna hi an siam ta a ni.

IPFT hian Tripura inthlanah khan Bharatiya Janata Party(BJP) nen ṭangrual in hnehna an chang a, BJP hian seat 35-a hnehna an chan laiin IPFT hian seat 8-ah hnehna an chang thung.

IPFT Secretary Mevar Kumar Jamatiya chuan cabinet ah minister pali an beisei thu sawiin pahnih chauh nei mah se an lawm tho niin a sawi. An portfolio chan tur erawh vawiina rinawmna thu tiamtir an nih hma chu puanchhuah theih a nih dawn loh thu a sawi thung.

Jamatiya chuan a hmain dinhmun zahawm tak leh chief minister hial pawh ngiat mah se tuna an dinhmunah hian an lungawi tho tih a sawi. BJP nen a hmain eng emaw inhriatthiam lohna an lo neih tawh pawh hun kal tawh a nih avangin sawichhuah leh a ṭul tawh loh thu a sawi bawk.

Tripura-ah hian Assembly seat 60 awmin chief minister chhiar telin cabinet minister 12 an awm thei a ni.

Vawiin hian BJP state president Biplab Kumar Deb chu rinawmna thu tiamtir in Chief Minister atan lakluh a ni dawn a, Tripura lal chhungkaw member, BJP member ni bawk Jishnu Devvarma chu deputy CM a ni dawn thung.