DRI-ten Meghalaya-ah ganja kg 2, 058 man

Directorate of Re­venue Intelligence (DRI) official thuchhuahin a tarlan danin Thawhlehni khan mi pakhat kut aṭangin Meghalaya-ah gan­ja (cannabis) kg 2,058 man a ni a, tunhnai kum eng emaw zat chhunga ṭum khatna ganja an man hnem ber ṭum a nih thu an sawi.

DRI official chuan an thudawn bawh­zuiin Shillong bula Dieng­pasoh-ah truck tlan lai an tihdin thu sawiin, he truck aṭang hian ganja (Cannabis Indica) kg 2,058 an man thu a sawi a, ganja hi corrugated paper carton hnuaiah dah thuhruk a nih thu leh tarpaulin a khuh leh thlap a nih thu a sawi bawk.

DRI official-te hi Border Security Force leh Shillong customs-ten ṭanpuiin motor khalhtu Mathura Kumar, Patna mi nia insawi chu an man nghal a ni.

DRI lam chuan an ganja man hi Tripura aṭanga phurh luh a nih thu leh Kolkata panpui tur a nih thu an sawi. Ganja tawlhru ṭhin hi pawl anga an awm thu pawh sawiin hetiang zat an man avang hian nghawng ṭha tak a neih an beisei thu an sawi bawk.

Financial year kal lai mekah hian ganja kg 7,200 man a ni tawh tih DRI-te chuan an sawi a, heng zinga kg 6,450 chu Assam aṭanga man a ni. Ganja an man hi a tlangpuiin Manipur leh Tripura lam aṭanga lakluh a nih thu an sawi bawk.