Meghalaya MLA thar 58-ten rinawmna thu tiam

Meghalaya Assembly Legislator tur atana thlan tlin thar mi 58-te chuan Nilaini khan House member ni turin rinawmna thu an tiam.

Thawhlehnia Gover­nor Ganga Prasad-an protem speaker ni tura rinawmna thu tiam tir National People’s Party (NPP) hruaitu hlun Timo­thy Shira chuan cabinet minister 11-te bik chu rin­awmna thu a tiamtir a ni.

Conrad Sangma, Tura aṭanga NPP Lok Sabha member ni bawk hi Pathianni khan United Democratic Party leh Hill State People’s Democratic Party bakah BJP in NPP an thlawp thu an sawi hnuah khan Meghalaya Chief Minis­ter atan Thawhlehni khan rinawmna thu tiamtir a ni tawh a ni.

Chief Minister kal­chhuak ta, Congress hruaitu Mukul Sangma chuan Songsak consti­tuency aṭang chauhin rinawmna thu a tiam thung a, Mukul Sangma hi bial pahnih aṭanga thlan tlin a ni a, Nilaini khan Ninganiah a seat luah tur a tichiang dawn chauh tih a sawi.

Rinawmna thu tiam­tir zingah hian Chief Minister pawh lo ni tawh, United Democratic Party Chief Donkupar Roy pawh a tel a, Roy hi Meghalaya Assembly member ni rei tawh ber a ni nghe nghe.

Union Minister hlui Agatha K. Sangma leh Rajya Sacha member hlui Thomas Sangma-te pawhin rinawmna thu an tiam ve bawk.

Meghalaya Assembly inthlan February 27-a neih takah khan party mala seat la hnem ber chu Congress ni mah se, NPP hi party tenau eng emaw zat bakah BJP leh indenpendent Legislator-ten an thlawp avangin Meghalaya Democratic Alliance tih invuahin sorkarna an siam ta a ni.

Hetih lai hian Wi­lliamnagar Constituency-ah erawh he biala ding tur Jonathone N, Sangma thah a nih avangin an la inthlang ve lo thung.