Tripura CM thar Biplap Deb Kumar lalut ta

Tripura state Bharatya Janata Party (BJP) president Biplap Deb Kumar chu nimin khan Tripura khawpui Agartala-ah Chief Minister atan rinawmna thu tiamtir niin lakluh a ni ve leh ta a, tunhnai hmarchhak state inthlan result puan a nih hnua Chief Minister atana lakluh pathumna a ni ta a ni.

Biplap Dep lakluh inkhawmah hian Prime Minister Narendra Modi pawh telin, BJP national president Amit Shah bakah ramchhung hmun hrang hrang-a BJP hruaitu mi eng emaw zat an tel bawk. Chief Minister chhuak ta Manik Sarkar, BJP hruaitu hlun LK Advani, Murli Manohar Joshi leh Home Minister Rajnath Singh-te pawh an tel a ni.

Tripura-ah hian Left front chuan kum 25 chhung zet sorkarna a chelh hnuah, February 18 inthlanah khan BJP hian chiang taka hnehna changin seat 60-ah seat 35 an la a, an thuruapui party IPFT-te chuan seat 8 an la thung.

Biplap Dep hi kum 48 mi miin RSS volunteer a ni ṭhin a, kum 15 lai Delhi-a RSS hruaitute hnuaia training a neih hnuah 2016 khan Tripura-ah let lehin politics-ah a lut ta a ni.

Prime Minister Narendra Modi chuan Tripura tan beiseina thar a awm thu sawiin, inthlanna ralmuang tak neih a ni thei kha lawmawm a tih thu a sawi.