Min bei turin Assam Police-ten mipui an fuih niin a lang : Meghalaya DSP

Assam leh Meghalaya state inrina, Umlaper-a Assam mite kut tuartu, Meghalaya deputy superintendent of police Firoz Rahman chuan mipuiten kut an thlak lai hian Assam Police-te chuan puih an tum loh thu leh an zinga ṭhenkhatten an fuih avanga mipuite pawhin kut an thlak nia a lan zawk thu a sawi.

Rahman hi Ri-Bhoi district-a post niin, Umlapher-a Assam police camp siam duh loa mipuite an punkhawm tuk, Nilaini khan thil awmdan thlithlai turin a kal a ni.

"Boruak ṭha lo thleng mai tura a lan avangin ka team te nen rang takin kan kal nghal a ni. Ramri buaina hmun kan thlen chuan Assam lam mite chuan min kal tlangtir a, mahse kan kir leh lamah kawng an lo dang ta thung a ni," a ti.

Meghalaya DSP chuan Assam Police-te chuan an lo ṭawiawm mai a beisei laiin, pui tura an ngenna pawh an chhang duh lo tih a sawi. "Tualchhung mite chuan min rawn panin ka driver nen chuan min rawn bei zui a ni.

Hetihlai hian Assam Police te pawh an awm a, mahse min ṭanpui tura kan ngenna pawh an ngaihsak duh lo a ni," a ti. Mipui pungkhawmte hian a driver chu leilet lamah an nawr chhuak a, amah chu a tlanchhe hman tih sawiin, "Tlanchhe lo ila chuan min that ngei ang," tiin a sawi.

"Keini lam aṭangin buaina engmah kan siam zui lo. Thawhlehni pawh khan kut min thlaktute ho nen hian ṭha takin kan indawr a ni. Mahse Nilainiah lungawi lo takin min bei leh thung a ni. Assam police ṭhenkhatte khan mipuite kha an fuihpawrh ngei niin a lang. Min pui tura kan ngen pawh khan police-te khan min pui duh tlat lo a ni," tiin Rahman chuan a sawi.

Assam miten Meghalaya DSP leh midangte an beih lai hian Assam police-te chu full gear in, bulletproof jacket nen an inthuam sa vek a ni. "Buaina a chhuak dawn tih hre lawk lo se, eng vangin nge bulletproof jacket te an lo hak kher ang?," a ti.

DSP hi hliam tuarin hmun ngaah ṭhui a ngai a, Shillong-a private hospital ah enkawl a ni. A driver hi a hliam na hle bawk.