Tripura-a zirtirtu bante'n nawrh huaihawt

Tripura-a zirtirtu bante chuan Inrinni liam ta khan Agartala-ah an hna ngaia dah let phutin nawrh an huaihawt leh.

Zirtirtu bante hi 10,323 an ni. Joint Movement Committee hmingin an hnaa dah let phut hian nawrh pawh an lo huaihawt fo tawh a ni. Supreme Court-ah pawh an zualko tawh a, mahse court chuan an thil phut hi a hnawlsak a ni.

Agartala-a nawrh an huaihawtnaah hian state chhung hmun hrang hrang aṭangin an kalkhawm a, rorellai BJP leh eptu CPIM-te hnenah zirtirtu aṭanga ban sing chuang leh an chhungte hian vote nuai chuang zet an nei pha tih sawiin, assembly inthlan neih leh hunah hei hian awmzia a nei dawn hle tih an sawi. An pawl hruaitu Bijay Krishna Saha chuan state sorkar leh court thiltih dan chu an dem thu a sawi.

Saha chuan rorellai, BJP chuan inthlan dawnah an hnaah dah let leh vek a tiam a, mahse an thu lo tiam tawh hi an sut leh a ni, a ti. An hna ngai pek leh an nih hma chuan an nawr zui zel dawn tih a sawi bawk.

Zirtirtu ban takten an thil phut tihlawhtling tura an nawrna avanga state chhunga dan leh thupek dinhmunin a tuar a nih pawhin, a mawhphurtu dik tak chu Tripura sorkar a nih tur thu Saha chuan a sawi. A ṭul a nih chuan High Court kawtah sit-in programme pawh an hmang dawn tih a sawi a, an chunga thil thleng chungchanga eptu hruaitute an ngawi reng chu an dem thu a sawi bawk a ni.