Manipur: Home Minister in Moreh-a ICP hawng dawn

Union Home Minister Rajnath Singh chuan March 15 hian Manipur-a Moreh-a Integrated Check Post (ICP) a hawng dawn.

ICP awmna tur hi sumdawnna hmunpui tur niin Myanmar leh Manipur inrinaa awm a ni a, India leh Myanmar insumdawn tawnna kawnga nasa zawka hma­sawnna a awm beiseia din niin Bharatiya Janata Party in Manipur-a sor­karna an siam kum khat lawmna ni pah fawma hawn a ni dawn a ni.

ICP hawnna hi Chief Minister N Biren Singh-an ‘inauguration fortnight’ a puan tawh zinga pakhat a ni a, ‘inauguration fortnight' hnuaiah hian kar hnih chhungin state chhung hmun hrang hrangah project 116 an hawng dawn a ni.

He hun hmang tur hian Prime Minister Narendra Modi pawh sawm a ni a, a kal hman dawn leh dawn loh erawh a la chiang lo.

Modi hi a kal hman dawn a nih chuan Manipur University-a March 16-a Indian Science Congress vawi 105-na neih tur pawh a hawng nghal dawn a ni. Hemi bakah hian National Sports University project ṭanna tura lungphum pawh a phum beisei a ni bawk.

Rajnath Singh-an Moreh khua a tlawh dawn vang hian venhimna pawh hi uluk taka kalpui a ni a, Pathianni aṭang khan a hmunhma pawh uluk taka dap tawh niin venhimna uluk taka kalpui a nih theih nan security force lam chu an inpuahchah a ni.

ICP Project atan hian cheng vaibelchhe 136 sen a ni tawh a, kum 20 dawn lai liamta aṭang khan hmalak ṭan tawh niin, March 15 hian hawn a ni dawn ta a ni.

Sorkarin an tarlan dan­in Myanmar nena insum­dawn tawnna aṭang hian 2010-11 chhung khan US dollar makta­duai 12.80 hmuh niin 2015-16 chhung khan US dollar mak­taduai 71.64 an hmu bawk.