XTECH-NECS Cup 2018 : Chanmari leh Ramhlun South an chak

NECS Cup 2018 semifinal lut tur a la chiang thei lo. Nimin Lammual inkhelah Chanmari leh Ramhlun South ten hnehna an chang a, team pahnih hi group A-ah awmin point li ve ve an hmu tawh. Group B inkhel awmchhunah Electric Veng chuan Lengpui 1-0 in an hneh.

Chanmari hian Jerry Mawihming­thanga hmangin champion lai Chhinga Veng chu 2-1 in an hneh a, ISL club Jamshedpur FC player Jerry hian goal hnih a khung. MPL-ah Chhinga Vengin Chanmari an ngam a, amaherawhchu Chhinga Vengin tualchhung football-a an rorel hun chhung chu Chanmari bawkin an tih tawi sak dawn niin a lang. Chanmari hian Mizoram Futsal League final-ah Chhinga Veng hi an hneh tawh bawk.

Ramhlun South-in Bethlehem Vengthlang chu 4-0 in an sawp a, BVT hi Chhinga Veng lakah 3-0 a an tlawm tawh bawk avangin semifinal an lut thei tawh lo. Group match hnuhnung bera Ramhlun South leh Chhinga Veng inkhel tur a ngaihnawm ang.

Electric Vengin Lalbiakzuala goal hmangin Lengpui 1-0 in an hneh a, point thum hmuin group B hmahruaitu Bawngkawn nen an point hmuh zat a inang chiah. Amaherawhchu, he group-a team palite hi vawi khat chauh an la inkhelh avangin semifinal lut tur sawi lawk theih a la ni lo.