Congress-in Assam special assembly session neih phut

Assam eptu party, Congress chuan an state chhunga hmeichhiate chunga pawikhawihna thleng hluar chho leh, Lower Subansiri Hydroelectri Project (LSHEP)-in an state tana harsatna a thlen theih dante sawiho tura Assam Assembly special session neih an phut.

Assembly-a leader of opposition Debabrata Saikia chuan India rama hydroelectric project lian ber tur, LSHEP zawhfel a nih hunah chuan Assam-a district pathum, Lakhimpur, Dhemaji leh Majuli-te tan chhiatna thlentu tur a nih thu a sawi. Sorkar thiltih sual avangin heng district pathumte hi dinhmun ṭha lo takah an ding mek a ni, a ti.

He project hi state sorkar enkawl, National Hydro Power Corporation (NHPC) in a siam a ni a, Arunachal Pradesh leh Assam ramria Subansiri luiah siam a ni. Kum 2005 aṭang khan hna hi thawh ṭan niin, kum 2010-a zawh tura tih a ni.Mahse harsatna awm vangin a zawh hun hi tihkhawtlai zel a ni a, kum 2023 March thlaa zawh tura tinzawn leh a ni.

Dam hi Arunachal Pradesh lamah awm dawn mah se, he dam aṭanga tui paihchhuah hi Assam in a tuar nasa zawk dawn tih Congress hruaitu chuan a sawi. Congress cheif minister hlui, Tarun Gogoi hunlai khan expert committee pawh dinin, he hmunah hian dam lian siam lo tur pawhin an lo ti tawh tih a sawi bawk. Committee chuan dam siam anih pawhin safety measure hrang hrangte kalpui turin rawtna an siam bawk a ni, a ti. Mahse BJP sorkar hnuah, chief minister hlui Sarbananda Sonowal chuan expert panel-te rawtna hi kalpui loin NHPC chu inremna a siampui niin a sawi. Project hi zawhfel a nih hunah Arunachal Pradesh hian power siamchhuah aṭanga 200MW a dawng dawn a, a nghawng tuar nasa tur zawk Assam chuan 25MW chauh a dawng ve thung dawn tih a sawi bawk.

Saikia chuan kum 2016-a BJP kaihhruai sorkar a din hnuah an state-a hmeichhiate laka pawikhawihna thleng a hluar chho hle tih sawiin, hetih lai hian thubuai siamsak zinga 5.5% vel chauh thiam loh chantir an ni a, hei vang hian police leh thuneitute hma lak dan pawh enfiah a ngai hle a ni, a ti.

TMC-in Mamata Banerjee chungchang a sawi danah Assam CM dem
Trinamool Congress (TMC) hruaitu Saugata Roy chuan Pathianni khan Assam chief minister Himanta Biswa Sarma chu West Bengal chief minister Mamata Barnerjee chungchanga a thusawi a dem thu sawiin, Assam CM chu party danga zuang lawr tiin a sawi.

Assam CM hian Trinamool Congress hruaitu Mamata Banerjee-i'n an state an tlawh a nih chuan red carpet phahin a lo lawm ang, tiin a ti el a, TMC hruaitu hian a tlawh a nih chuan inthlanah BJP chuan an ṭhat phah sawt dawn a, TMC leh Congress vote chu a darh phah dawn a ni, a ti.

TMC hotu Saugata Roy chuan Assam CM thusawi hi chhangin, "Party dangah zuang lawr mai a ni. Tarun Gogoi chief minister a nih khan Congress a chhuahsan a, a hnuah mi ṭha tak Sarbananda Sonowal thlakin chief minister-ah a awm ve leh ta a ni," tiin Sarma kaihhruai sorkarah chuan ramri buaina avangin Assam police-te an thih phah a, Dimasa helten truck driver-te an that bawk a ni, a ti. Assam dinhmun chu a chhe sawt hle tih sawiin, West Bengal chungchang sawi ve loin an state dinhmun siamṭhat chu ngaihtuah zawk rawh se, a ti.

Assam-ah TMC chu an lut ngei dawn tih Roy chuan a sawi a, "Minority vote, Bengali vote leh Assames Hindu vote pawh kan hmu dawn a, Assam-ah TMC hian a chet ṭhat chhoh hle kan beisei a ni," tiin a sawi.