Hmarchhak state-ah wellness centre 1,000 din dawn : Sonowal

Union minister of AYUSH Sarbananda Sonowal chuan hmarchhak state hrang hranga Central Sector Scheme hnuaiah hma lak a nih tur thu sawiin, traditional healthcare service tihchantlunna turin health and wellness centre 1,000 din a ni dawn tih a sawi.

National Ayush Mission (NAM) atan centre-te hi din a ni dawn a, Assam-a Goalpara district-a Duhnoi-ah ayurvedic college dinin, hemi atan hian cheng vaibelchhe 70 ruahman a ni tawh tih a sawi. Sorkar laipui chuan kum nga chhung, kum 2026 March thla thleng atan Nation Ayush Mission hi kalpui chhunzawm a lo remti tawh a, he mission atan hian cheng vaibelchhe 4,607.30 ruahman a ni. Ministry chuan Guwahati-a Government Ayurvedic College chu Rs vbc 10 senga Centre of Excellence-a upgrade a tum bawk.

Sonowal chuan hmarchhak state hrang hrangte chu Ayush educational institute dinna tura rawtnate ministry-ah thehlut turin a ngen. Hmarchhak bialah hian raw material sawngbawlna tur, facilitation centre siam tum a ni bawk tih a sawi.

Hmarchhak biala ayush medical facility hrang hrangte chu health management information system (AHMIS) hnuaiah dah an ni dawn tih Sonwal chuan a sawi bawk.