Covid-19 : Hmarchhak dinhmun

Arunachal Pradesh-ah Pathianni  khan Covid-19 kai mi pahnih hmuh chhuah belh an ni a, an state-ah hri kai hi mi 51 an awm tawh a ni. 

State health official chuan hri kai hmuh tharte hi Changlang district-a mi an nih thu leh, state dang aṭanga lo haw ve ve an ni tih a sawi. An pahnih hian asymptomatic an ni a, quarantine centre-a awm lai an ni. 

AP-ah hri kai zinga pakhat chu enkawl dam a ni tawh a, mi 50 kai mek an awm. An zinga mi 34 chu Changlang district-a mite an ni tih State Surveillance Officer Dr L Jampa chuan a sawi. 

Assam

Assam state-ah Pathianni khan hri kai hmuh chhuah belh mi 155 awmin, nimin khan mi 83 an awm leh a, heng mite nen Covid-19 kai hmuh tawh hi mi 2,776 an tling tawh a ni.

Hri kai hmuh tawh zinga 664 chu enkawl dam tawh niin, enkawl lai 2,140 an awm. Assam-a district tinah hri kai hi hmuh an ni tawh a; Hojai, Dhubri, Kamrop (Metro) leh Golaghat te chu an tam zualna a ni. 

May 25 aṭanga thlawhtheihna service a nih leh hnuah, thlawhtheihna hmanga haw zinga mi 74 chuan Covid-19 an kai tih hriat a ni a, an zingah hian Kuwait aṭanga haw mi 30 an tel. 

Assam-a hian Covid-19 sample 1,53,326 chu test a ni tawh tih Health and Family Welfare Department chuan a tarlang bawk. 

Pathiannia sample test zingah mi panga chuan Covid-19 an kai tih hmuh chhuah a ni a, Nagaland-a hri kai awm zat hi mi 123 an ni tawh a ni. 

Hri kai hmuh thar mi panga te hi Dimapur-a mi pahnih leh Kohima-a mi pathum an ni, quarantine centre-a awm lai vek an ni. 

Health minister S Pangyu Phom chuan Pathianni khan sample 220 test a nih thu sawiin, heng zinga panga hi an positive a ni, a ti. Hri kai hmuh tawh zinga mi pariat chu enkawl dam an ni tawh a, enkawl mek mi 115 an la awm. 

Manipur-ah Pathiannia sample 1,249 test zingah Covid-19 kai an awm lo a, May 13 hnu lamah ni khata hri kai hmuh chhuah thar awm loh ni awmchhun a ni. 

Additional health secretary Dr K Sasheekumar Mangang chuan sample 714 hi Regional Institute of Medical Sciences (RIMS)-a  Virus Research and Diagnostic Laboratories (VRDL) test a ni a, a bak 535 hi  Jawaharlal Nehru Institute of Medical Sciences (JNIMS) test a nih thu a sawi.

Sample test zingah hian Covid-19 kai hmuh tawhte nena inkhawih leh inhnaihvaite pawh an tel tih a sawi bawk. 

Manipur-ah hian sample 17,885 test a ni tawh a, heng zinga 172 chuan Covid-19 an kai tih hriat a ni tawh bawk. Hri kai zinga 52 chu enkawl dam an ni tawh a, mi 120-te enkawl mek an ni. 

Meghalaya-ah Maharashtra aṭanga haw mi pahnih leh Tamil Nadu aṭanga haw mi pakhatin Covid-19 an kai tih hmuh chhuah a ni a, an state-a hri kai hmuh chhuah tawh hi mi 36 an tling tawh. 

Hri kai zinga pakhatin a thihpui tawh a, mi 13 enkawl dam an ni tawh. Enkawl mek hi mi 22 an awm a ni. Hri kai hmuh tharte hi East Khasi Hills-a mi, quarantine lai an ni. 

East Khasi Hills District Magistrate chuan nimin aṭang an district chhunga zan lam curfew chu June 15 thleng atan a pawtsei a, CrPC 144 puangin inter-state movement khap a ni a, bazar leh shopping complex-te khar vek an ni bawk a ni. 

Tripura chief minister Biplab Kumar Deb chuan Pathiannia sample test 1,153 zingah 53 chuan Covid-19 an kai tih hmuh a nih thu a sawi. Tripura-a hri kai  hmuh tawh hi mi 803 an awm tawh a ni. Hri kai zinga pakhat chu Pathianni khan a thi. 

Pathiannia hri kai hmuh thar zinga 49 chu Sepahijala district-a mi an ni a, Gomati district-a mi pali an tel bawk. Hri kai hmuh tharte hi an vaiin rel hmanga Chennai aṭanga haw an nih thu CM chuan a sawi. 

Hri kai zinga 192 chu enkawl dam ni tawhin, damdawi-in aṭangin chhuah tir an ni tawh a, enkawl mek 607 awmin, state danga haw mi pathum an awm bawk.