Tripura-in private tuition pe lo turin zirtirtute hriattir

Tripura sorkar chuan sorkar school-a zirtirtute chu private tuition pe lo turin a ti a, an pe lui a nih chuan an hna an bansan a ngai dawn tih a sawi. 

Education minister Ratan Lal Nath chuan sorkar school zirtirtuten private tuition an pek leh pek loh hi vawiin aṭangin enfiah a ni dawn tih a sawi. "Kum 1996 aṭang khan hemi chungchangah hian zirtirtute chu hriattirna pek an lo ni fo tawh a, High Court pawhin sorkar school, government aided school leh private school-te pawh private tuition pek ṭhin titawp turin thu a lo pe tawh a ni," a ti. 

A bikin sorkar school-a thawk zirtirtute chu private tuition an pek an remti lo tih sawiin, sum hmuh belhna tur dang an duh a nih chuan sorkar hna an thawh chu  bansan mai turin a ti a ni.