Manipur helten PM Modi zin tur an dodal
Manipur-a underground hel pawk paruk intel khawm Coordinating Committee (Corcom) chuan Prime Minister Narendra Modi leh Home Minister Rajnath Singh ten an state an tlawh tur an duh lo tih lantir nan darkar 17 chhung bandh an huaihawt tur thu Thawhlehni khan an sawi.
Carcom chuan bandh hi March 16 zing dar 1 aṭanga neih ṭan tur a nih thu an sawi. Mipuite chu official function-a tel lo tura hriattir nghal in, exam leh service pawimawh dangte erawh bandh hian a huam dawn lo tih an sawi.
Hetih lai vek hian Mapithel dam, tihluihnaa hawn tum dodal tu Joint Action Committee-te pawhin darkar 48 bandh an nei ve thung a, March 16 thleng an bandh dawn thung.
Ruahman anga thil a kal a nih chuan naktuk zingah hian Modi hian Manipur hi a thleng dawn a, ni khat a cham ang. Manipur-a a cham chhung hian tihtur pawimawh hrang hrang a nei a, project tlem azawng ṭanna tur lungphum a phum dawn bakah sports university project kalpui ṭanna tur lungphum a phum dawn a ni.
Prime Minister hian Chief Minister N. Biren Singh-a bial, Heingang constituency-a Luwangshangpham ground-ah thu a sawi dawn a, Manipur University Campus-a Science Congress vawi 10-na neih tur pawh a hawng nghal dawn bawk a ni.
Home portfolio changtu ni bawk, Chief Minister Biren Singh chuan Imphal leh a chhehvela dan leh thupek uluk taka kenkawh a nihna turin state bakah central security force-te chu uluk taka venhimna kalpui turin thu a pe. Modi leh Singh-an an tlawh tur hmun leh a chhehvelah hian Pathianni
aṭang khan venhimna uluk taka kalpui ṭan a lo ni tawh bawk.