Tripura BJP hruaitu in bawngsa zawrh khap a nih dawn loh thu sawi

Tripura-a Bharatiya Janata Party (BJP) hruaitu Sunil Deodhar chuan Tripura-ah bawngsa zawrh an khap ve dawn loh thu a sawi.

Sunil Deodhar chuan Tripura-ah Kristian leh Muslim an tam thu sawiin, Hindu eng emaw zat bawngsa ei an awm bawk thu a sawi a, hemi a nih avang hian bawngsa zawrh leh ei khap a nih ve dawn loh thu a sawi a ni.

Tripura-a BJP in hnehna an chan theihna tura sulsutu pawimawh tak mai Deodhar chuan state chhunga mi tam zawk duhdan ngaihpawimawh a ṭul thu a sawi. Thutlukna tam tak hi chu mipuite duhdan anga kaltlangpui a ngai ṭhin a ni, a ti bawk.

Kum kalta khan BJP hruaitun hlun chuan Me­gha­laya-ah thlantlin an nih chuan bawngsa zawrh an khap dawn loh thu a lo sawi tawh a, mahse sa talh­na hmunah sa talh tur zat chinah khuahkhirhna siam erawh an tum niin a sawi.

Hetih lai hian BJP kaihhruai NDA ṭangrual pawlin 2014 Lok Sabha inthlanpui neiha hnehna an chan hnu khan bawngsa zawrh khap chu an hma­lakna pui ber pakhat a ni mek thung. Reuters report in a tarlan dan phei chuan kum 2010 aṭanga 2017 chhung khan bawng kaih­hnawiha buaina chhuak vangin ni 27 in nun­na an chan a, mi 124 in hliam an tuar tawh a ni.