Meghalaya Minister 12 zinga 8 ‘Crorepati'

Association for Democratic Reforms (ADR) leh Meghalaya Election Watch-te zirchianna in a tarlan danin Meghalaya minister 12 zinga pariat chu mi hausa, ‘crorepati' (cheng vaibelchhe khat nei tling) an ni a, an sum neih zat chawhrual chu cheng vaibelchhe 13.07 a nih thu an tarlang bawk.

ADR leh Election Watch-te hian minister-te hausak dan hi an affidavit thehlut aṭangin an zirchiang a ni.

Report-in a tarlan dan chuan Mairang constituency bialtu Metbah Lyngdoh chu hausa ber niin cheng vaibelchhe 87.26 a nei a, a dawttu chu Comingone Ymbon (Raliang constituency) niin cheng vaibelchhe 26.39 a nei a, Lahkmen Rymbui (Amlarem constituency) chuan dawt lehin cheng vaibelchhe 11.21 a nei thung.

Hetih lai hian minister zinga sum nei tlem ber chu Hamletson Dohling (Mylliem constituency) niin cheng nuai 31.83 a nei a, Samlin Malngiang (Sohiong constituency) chuan dawtin cheng nuai 35.11 a nei thung a, Banteidor Lyngdoh (Mawkynrew constituency) chu sum nei tlem lamah pathumna niin cheng nuai 35.23 a nei a ni.

Report chuan minister paruk te chu pawl 8-12 inkar an nih thu a tarlang a, midang paruk te chu graduate leh a chunglam an nih thu a tarlang bawk.

Meghalaya hian hmeichhe minister an nei lo a ni.