Manipur : Assam Rifles-ten KCP mi pahnih man : Drug cheng vaibelchhe 11 hu man bawk

Assam Rifles leh Imphal East Commandos-te ṭangrualin Manipur-a Kontha Aallup-a beihpui an thlaknaah hel pawl Kangleipak Communist Party (KCP) mi pahnih an man a, an mi man te kut aṭang hian ralthuam eng emaw zat leh ruihhlo an man tel bawk.

KCP mite hnen aṭang hian 9mm pistol pahnih, mines pahnih, Improvised Explosive Device pakhat, live round pali, opium 1.8kg vel leh danin a phal loh thil dang eng emaw zat an man a ni.

Assam Rifles press statement in a tarlan danin an mi mante pahnih hi pawikhawihna hrang hrangah inhnamhnawih ṭhin an ni a, Catholic School tibuaitu zingah pawh an tel a ni. An zinga pakhat phei hi chu KCP pawikhawihna hrang hranga a bultumtu ber pakhat a nih thu an tarlang.

Heng an mi man te hi thu zawhchian an la ni leh dawn niin an tarlang bawk.

Hetihlai hian Thawhlehni zan dar 6 velah khan Tengnoupal bulah Assam Rifles-ten Brown Sugar leh WY tablet ṭhahnem tak an man a, an ruihhlo man hi cheng vaibelchhe 11.96 man hu a ni.

AR-te chuan an thudawn bawhzuiin Thawhlehni zan dar 6 velah khan MVCP Tengnoupal-ah TATA Sumo lo tlan chu an tihdin thu leh uluk taka an endik hnuah Brown Sugar packet 138, kg. 1.865-a rit leh WY tablet 90, 000, packet 450 an dah chu an man thu an sawi.

Motor khalhtu Moreh lam mi Paokholen Baite (21) chu an man nghal a, heng ruihhlo te hi Shillong lam panpui a tum tih AR-te chuan an sawi. Ruihhlo neitu hi Narcotic Control Bureau (NCB) Imphal kutah hlan a ni tawh a ni.