Tripura Charilam by-election-ah BJP bawkin hnehna an chang

Tripura Charilam Constituency-a March 12-a by-election neihah Bharatiya Janata Party (BJP) candidate Jishnu Debbarma chuan hnehna changin, a khingpui Communist Party of India- Marxist (CPI-M) candidate chu vote 25,550 laiin a hneh.

Jishnu-an hnehna a chan ve leh tak avangin seat 60 awmna Tripura Assembly-ah BJP hian seat 36 an la ta a, an thurualpui Indigenous People’s Front of Tripura (IPFT) chuan seat 8 an la tawh bawk a, BJP-IPFT ṭangrual hian seat 44 an chang tawh a ni.

Tripura Assembly inthlan hi February 18 khan neih a ni a, hetih lai hian Charilam constituency-ah erawh CPI-M candidate Ramendra Narayan Debbarma February 11-a cardiac arrest vanga a boral avangin March 12 khan inthlanna hi an nei ve chiah a, Ningani khan inthlan result hi puan niin Jishnu Debbarma hian hnehna hi a chang ta a ni.

Returning Officer Samit Roy Chowdhury chuan Debbarma hian vote 26,580 a hmuh laiin a khingpui CPI-M candidate Palash Debbarma chuan vote 1,030 chauh a hmu thung tih a sawi a, Congress candidate erawh chuan vote 775 chiah a hmu thung a ni.

By-election atana campaign-na ni tawp ber March 10 khan CMI-M cnadidate hi a inhnukdawk a, mahse inhnuhdawh hun a tawp tawh avangin a hming hi vote theiha dah lan a ni ta tho a ni.

Kum nga kalta kha chuan CMI-M kaihhruai Left Frone sorkar hian Tripura Assembly-ah seat 50 an luah a, tunah erawh seat 16 chiah an luah thei tawh thung.