Arunachal in Chieftainship chhunzawm dawn : Khandu

Arunachal Pradesh Chief Minister Pema Khandu chuan Ningani khan Assembly-ah an state chhunga pipu hunlai aṭang tawha an lo kalpui ṭhin, lal neih (chieftainship) chu kalpui chhunzawm zel a nih tur thu sawiin, state chhunga mi hrang hrang awmte inpumkhatna lantirtu a nih thu a sawi.

Khandu chuan BJP member Wanglin Lowangdon zawhna chhangin lal neih chu kalpui chhunzawm zel a nih tur thu a sawi. Wanglin Lowangdon hi Tirap district-a Borduria thingtlang khuaa lal ni lai a ni nghe nghe a, Khandu chuan Tirap, Longding leh Namsai district-a chieftainship kalpui mek chu chhunzawm zel a nih dawn thu a sawi a ni.

An thuneihna hnuaia awm district thuneitute pawhin an zah thu leh an ngaihpawimawh thu a sawi bawk.

CM chuan lal te chuan dis­trict thuneitu te buaina hrang hrang chinfelna kawngah an puih nasat ṭhin thu sawiin, dan leh thupek kenkawhna kawngah pawh an ṭanpui nasa hle tih a sawi a, ram chung­changa buainaah pawh nasa takin an ṭanpui a ni, a ti.

Khandu chuan thingtlang khua te leh thuneitu lamin inbiakpawhna ṭha tak an neih theihna turin chieftainship chu kalpui chhunzawm zel a ni dawn a ni, a ti bawk.

Chief Minister chuan state sorkark in hnam rohlu leh hnam tihdan phung, ṭawng, incheina leh thawnthu thlenga humhalh leh chawilar tu tur department of Indigenous Affairs-a din thu a sawi a ni.