Assam Congress-in AIUDF leh BPF thawhpuina titawp

Assam Congress chuan eptu ṭangrual pawl, 'Grand Alliance' hnuaia an thawhpui, All India United Democratic Front (AIUDF) leh Bodoland People’s Front (BPF) an thawhpuina chu a titawp dawn tih a sawi.

State Congress president Bhupen Bora kaihhruaia, Thawhṭannia core committee meeting chuan he thutlukna hi siamin, AIUDF-in BJP inzawmna a neihpui dan leh, an hruaituten BJP leh chief minister-te an fak fo chu Congress member-te chuan mak an ti hle tih sawiin, mipuiten Congress party an hmuh dan tur thlengin a nghawng a ni, an ti. Core committee member-ten ngun taka an ngaihtuah hnuah, AIUDF chu Grand Alliance, Mahajot chuan a thawhpui zel thei tawh lo tih an sawi. BPF pawhin kawng hrang hrangin Mahajot-a awm zui an duh lohna pawh an lantir a ni, hei vang hian anni pawhin an thawhpui thei tawh loh tih an sawi bawk.

AIUDF chuan ṭangrual pawl aṭanga Congress-in paih a tum chu thil ṭha lo tak leh vanduaithlak tak a nih thu an sawi thung. AIUDF legislature party leader Hafiz Bashir Ahmed chuan, state chhunga rorellai BJP-te chet dan thlithlai leh enfiah reng tura secular leh democratic party-te ṭanrual leh thawhho ṭhat a ngaih laia hetiang thutlukna an siam mai chu a pawi hle a ni, a ti. "Ṭangrual pawl chakna hi mi ṭhenkhatte ngaihdan avangin kan tichhe mai tur a ni lo. AIUDF chuan BJP communal policy hi englai pawhin a dodal reng a, a dodal chhunzawm zel bawk ang. Congress chuan ṭangrual pawl ṭhendarhna tur ni lo, a tihchakna tur hi a ngaihtuah zawk tur a ni," tiin a sawi.

Political party 10-te thawhhona, Granda Alliance, 'Mahajot' tih hi Congress party kaihhruaiin kumin state assembly inthlan neih hma khan din a ni. Ṭangrual pawlah hian Congress bakah AIUDF, BPF, Imochayan (Deori) People’s Party (JDPP), Adivasi National Party (ANP), CPI(M), CPI, CPI(ML), Anchalik Gana Morcha, leh RJD-te an tel. Assembly inthlanah khan seat 50 lain, heng zinga seat 29 chu Congress party lak a ni a, AIUDF hian seat 16, BPF-in leh CPI(M) in seat khat an la a ni.

Assam Congress MP Gaurav Gogoi chuan an party chauh chu BJP do let thei a ni tih sawiin, an inthuam chak a ṭul thu a sawi. Hemi rual hian Assembly-ah BJP sorkarin mipuite tana ṭha lo tur policy a siam a nih chuan, an party chuan hma lak dan turah party dangte chu a be rawn zel dawn tho tih a sawi.