Meghalaya Minister-in oil palm chin duh lo : Ngaihtuah ṭha leh turin sorkar laipui a ngen

Meghalaya environ­ment and forest minister James Sangma chuan sorkar laipuiin scheme siam thar hnuaia Meghalaya-a oil palm plantation siam tumna chu duh loin, ngaihtuah ṭha leh turin a ngen.

James Sangma chuan oil palm chu a chinna biala bioderversity tichhetu a nih avangin Meghalaya leilung dimdawi ngai taka chin chu an ngaihtuah hle tih a sawi. He scheme kalpui tumna state tam zawk pawhin an duh lo tih sawiin, hemi chungchang hi union ministry of forest, environment and climate change pawh a sawipui leh tur thu a sawi bawk.

Sorkar laipui chuan scheme thar, National Mission on Edible Oils – Oil Palm (NMEO-OP) kalpuina turin cheng vaibelchhe 11,040 a lo pawm tawh a, he scheme hnuaiah hian kum 2025-2026 thlengin ram hectare nuai 6.5-a zauah palm tree hi chin belh tum a ni. Oil palm chin belhna atan hian hmarchhak bial leh Andaman & Nicolar Island-te chu thlan an ni.

Meghalaya-a oil palm plantation siam tum hi state chhunga political party hrang hrang leh pawl eng emaw zat chuan an duh loh thu an sawi tawh bawk.

Meghalaya MP-in PM Modi hnenah lehkha a thawn
Meghalaya MP Agatha Sangma chuan prime minister Narendra Modi hnenah lehkha thawnin, sorkar laipuiin hmarchhak biala oil palm plantation siam a tum chu a duh lo thu a thlen.

Tura bial MP chuan, "Palm thing te hi India hmarchhak a tualṭo an ni lo a, hetianga ram chhunga tualṭo nilo, tui mamawh tam leh lei hnuai tui hip kang chak em em mai kan lak luh a tam tham taka kan chin darh hian khuarel kalhmang leh inkungkaihna nasa tak a ti danglamin, lei hnuai tui in khawlkhawm thlengin a ti buai dawn a ni," tiin PM hnena lehkha a thawnah hian a sawi a ni. He scheme hi kaltlangpui a nih hmain stakeholder hrang hrangte zau zawka rawn turin a ngen.

Central scheme hnuaia hmarchhak biala oil palm chin tum hi bial chhunga environmentalist-te chuan ram leilung tichhetu tur tia sawiin an dodal nasa hle.