Tripura : Minister zinga 3 in Criminal case nei, 'crorepati' 6 awm

Association of Democratic Reforms (ADR) in a tarlan danin Tripura Minister 9 zinga pathum chuan criminal case serious tak an nei a, 'crorepati' (cheng vaibelchhia nei tling) paruk an awm bawk.

ADR chuan Bharatiya Janata Party hruaitu Ratan Lal Nath chuan criminal case lian tak tak, attempt to murder, rioting, defamation kaihhnawihah te case a nei tih an tarlang a, BJP minister Sudip Roy Barman pawhin case a nei tih an tarlang. BJP minister tho Manoj Kanti Deb pawhin case pahnih a nei tih an tarlang a, hetih lai hian tumah hi an thubuaiah hian thiam loh chantir an nih loh thu an tarlang bawk.

ADR chuan minister paruk chu 'crorepati' an nih thu an sawi bawk a, BJP hruaitu Jishnu Devvarma, Pranajit Singha Roy leh Sudip Roy Barman-te chu minister hausa ber te an nih thu an tarlang.Jishnu hian cheng vaibelchhe 11 a nei a, Pranjut hian cheng vaibelchhe 5 neiin Sudip hian cheng vaibelchhe 3 a nei niin an tarlang a ni.

Pencharthal Constituency ami BJP minister Santana Chakma chu sum nei tlem ber niin cheng nuai 1.34 a nei thung.

Minister 7 chu graduate an nih thu tarlan a ni a, Minister 2 post graduate an awm bawk.

Minister 4 chu kum 31-50 inkar an ni a, 5 chu 51-80 an ni bawk. Tripura-ah hian hmeichhe miniter pakhat a awm ve bawk a ni.