AP-China border-a khaw 18 Model Village-ah siam dawn : Rijiju

Union Minister of State for Home Affairs Kiren Rijiju chuan Zirtawpni khan sorkar laipuiin Arunachal Pradesh-a khaw 18-te chu model village-a siam tura thutlukna a siam thu a sawi.

Itanagar-a press conference-ah Rijiju chuan Upper Siang-a Gelling leh West Siang-a Singbir khua te chu hmalak hmasakna tur a nih thu sawiin, hmalak ṭan nan hian cheng vaibelchhe 23.14 sanction a ni dawn a ni, a ti. A la bang khua te tan hian cheng vaibelchhe 2 ṭheuh sanction tura ruahman a nih thu a sawi bawk.

Model Village tura thlan hoah hian hriselna, tui, electric leh infrastructure lama hmasawnna tur ruahman a nih thu Minister chuan a sawi. Heng khua tena pawisa an hmuh tur hi border area development dawn ṭhin aṭang ni loin a hranga sanction a nih dawn thu a sawi.

Vivekananda Kendra Vidhyalayas (VKVs) in state chhunga zirna lama hma a lak dan pawh hriatpui a nih thu sawiin, Minister chuan Home Ministry in VKV tihchangtlun nan cheng vaibelchhe 80 an sanction dawn tih a sawi bawk.

Anini, Lazu, Nafra leh Mukto VKV-te tan cheng vaibelchhe 60 hman a ni dawn tih sawiin, a la bang zawng chu Amliang, Niusa, Koloriang leh Chayangtajo VKV-te tihchangtlun nana hman a ni dawn niin a sawi.

Rijiju chuan ITBP (Indo Tibetan Border Police) Frontier Headquarter, Shillong-a awm pawh a ṭhat zawk beiseina avang leh a awlsam zawk beiseina avangin Arunachal-ah sawn a ni dawn tih a sawi a ni.

ITBT Sector Headquarter chu Lower Siang-a Likabali-ah dah a nih dawn thu a sawi a, Battalion Headquarter erawh Basar-ah dah tura ruahmanna siam a nih thu a sawi.

Arunachal Pradesh chuan National Disaster Response Force (NDRF) battalion headquarter pawh an neih dawn thu sawiin Holongi-ah cheng vaibelchhe 153 senga sak a nih dawn thu a sawi bawk.