Tripura-a nawrh huaihawt zirtirtute man

Tripura-a Adhoc teacher, nawrh huaihawt mi 1,000 vel chu Thawhlehni khan police-ten an man.

Adhoc tearcher-te hian kar liam ta Inrinni aṭang khan an hna aṭang ban tumna duh lohin nawrh hi an huaihawt a ni. Supreme Court leh High Court thupek angin Tripura sorkar hnuaia Adhoc teacher 10,323 te chu an hna tihtawp sak an ni dawn a ni. Hei hi duh loin, zirtirtute hian an hna thawh chhunzawm zel phutin nawrh hi an huaihawt a ni. 

Police-te chuan tunlaia ram hrang hranga hri leng mek, Covid-19 avangin sorkar chuan mipui pun­khawm a khap a, zirtirtu nawrh huaihawtte pawh sit-in protest an huaihawt chu titawp turin an ngen tih an sawi. Mahse an kal darh duh loh avangin nawrh huaihawta kalkhawm, mi 1,000 vel chu an man ta tih an sawi. 

Hetih lai hian zirtirtute chuan nikum chhung khan vawi tam tak an thil phut nawrna atan nawrh  an huaihawt tawh a, Inrinni aṭang khan tiam chin awm loin sit-in protest hi an nei zawm leh tih an sawi. Mahse hetichung hian sorkar chuan anmahni be turin aiawh pawh a tir lo a, an thil phut chungchang pawh sawipui a tum lo tih an sawi thung. 

Ad-hoc Teachers' Asso­ciation president Bimal Saha chuan rel station, bus stand, airport, bazar, shopping mall leh hmun hrang hrangah mipui an pungkhawm reng a, mahse sorkar chuan Covid-19 chhuanlama hmangin nawrh huaihawta pungkhawm zirtirtute ho chauh chu a bitum thung tih a sawi a ni. 

BJP kaihhruai sorkar chuan Adhoc teacher-ten an hna an chhunzawm theihna tura hma a la lo a nih chuan, nasa zawkin nawrh an huaihawt zel dawn tih a sawi a ni.