Akhil Gogoi bail-in chhuah tir

Guwahati-a National Investigating Agency (NIA) court chuan Krishak Mukti Sangram Samiti (KMSS) hruaitu Akhil Gogoi bail dilna chu phalsakin, Thawhlehni khan Rs 30,000 dahkham tirin a chhuah tir. 

RTI activisit Gogoi hi nikum December thlaa Assam-a Citizenship Amendment Act (CAA) dodalna lantirna kaihhnawihah, NIA chuan mipuite chu sorkar huatna leh do tur zawnga fuihah puhin an man a ni. Man a nih hnu hian Unlawful Activities (Prevention) Act (UAPA) hnuai­ah thubuai an siamsak zui nghal bawk. 

Mahse NIA hian man a nih aṭanga ni 90 chhunga chargesheet an thehluh theih loh avangin Akhil Gogoi hi chhuah a ni ta a ni. NIA hian hun pek belh turin ngen mah se court-in a hnawlsak a ni.  Akhil Gogoi chhuah phutin Assam leh hmun dangah nawrh huaihawt a ni a, a nu Priyada Gogoi pawhin nikum December 20 aṭang khan a fapa chhuah phutin tiam chin awm loin chaw a nghei bawk. Mahse a hriselna a ṭhat loh phah avangin a chaw nghei hi tihtawp luih sak a ni.