Tripura : IPFT in State ṭhendarh tura hmalakna thlawp

Tripura-a Bharatiya Janata party (BJP) nen ṭangruala sorkarna siam mek Indigenous People's Front of Tripura (IPFT) chuan Pathianni khan New Delhi-a National Federation-ten state thar ngiata nawrh an huaihawta tel turin an party aiawh mi 500 an tir.

New Delhi-a nawrh huaihawtah hian IPFT bakah hian mi tam tak state hran din duh an tel ve bawk a ni. Nawrh huaihawtte hian Prime Minister chu state thar dinsak turin an nawr a, heng zingah hian Twip­raland dinna tur pawh a tel a ni.

BJP nena thawkdun ni si, joint demonstration-a an tel hian zawhna a ti tam hle a, inthlan hma khan BJP chuan state hran ngiat chungchanga an dinhmun an tichiang tawh a, IPFT hnenah pawh hemi chungchang hi chu sorkar laipui kuta dah a nih thu an lo hrilh tawh bawk.

Sorkar thar lakluhna in­khawmah khan Prime Minister Narendra Modi chuan Tripura-a Tribal community-te duhna tihhlawhtlin leh hmasanna thlen chu sorkar laipuiin a tihtur a nih thu a lo sawi tawh a ni.

Tripura-a cabinet minister pakua awm zingah hian IPFT hian minister pahnih an nei a, minister pakhat zawk Forest and Tribal Welfare portfolio changtu Mevar Kr Jamatia, IPFT Genral Secretary ni bawk chu joint demonstration-ah hian a tel ve nghe nghe a ni.

Hetih lai hian IPFT eptu Indigenous Nationalist Party of Twipra (INPFT) vice president Jagadish Debbarma chuan IPFT rilru tak tak a langchhuak nia sawiin, tribal state hran IPFT chuan din an duh tih a sawi.

Communist Party of India- Marxist (CPI-M) pawhin joint demonstration-a IPFT tel chhan hi chiang taka a chhan hriat an duh thu an lo sawi ve bawk.

Hetih lai hian BJP Vice Pre­sident Subal Bhowmik chuan hetianga state hran ngiatna hi BJP chuan a pawm ngai loh tur thu leh Prime Minister pawhin state ṭhendarh chu a remtih loh thu a sawi a, BJP chuan Tripura-a tribal mite tihhmasawn a an autonomous district council tihchangtlun erawh a tum niin a sawi.

Bhowmick chuan IPFT chuan anmahnia ngaihdan bik leh tum bik an neih thu sawiin, an thawhdunna nen chuan hei hian inzawmna a neih loh thu a sawi bawk a ni.