AP : Anini Assembly aṭangin Mi 96 in BJP an zawm

Arunachal Pradesh Chief Minister Pema Khandu chuan Thawhṭanni khan Anini Assem­bly constituency aṭangin mi 96 chu Bharatiya Janata Party (BJP)-ah a lawmlut.

Pema Khandu hian vantlang inkhawmah heng mite hi lawm lutin, a lawmluh zingah hian mi pawimawh tak tak Zilla Parishad Chairperson Di­pen Molo, Anchal Chair­person, Anini block-te pawh an tel a, pan­chayat hruaitu hlui leh khawtlang hruaitu eng emaw zat pawh an tel.

He hunah hian State BJP President Tapir Gao, Art and Culture Minister Dr Mohesh Chai, Tourism Parliamentary Secretary PD Sona, Planning Parliamentary Secretary Zingnu Namchoom, local MLA Rajesh Tacho leh Lok Sabha MP hlui Laeta Umbrey te pawhin CM hi an ṭawiawm a ni.

Chief Minister chuan thu a sawinaah Anini chu hmun mawi tak, Tawang leh Mechuka ang maia mawi a nih thu a sawi a, tunhnaiah khualzin mite pawh nasa taka a hip thu a sawi a, kalpawhna kawng ṭha zawk a la mamawh thu sawiin 2-lane Roing-Anini highway siam tura ruahmanna a awm mek thu a sawi bawk.

Tualchhung miten damdawi-in, khum 100 awmna boys hostel leh multipurpose hall sa tura an ngenna memorandum an thehluh chungchang pawh sawiin district planning board kaltlangin hma lak a nih dan tur a ngaihtuah dawn thu a sawi.