Meghalaya Assembly-ah a hmasa ber atan Khasi ṭawngin thu sawi

Meghalaya Assembly session neih mekah a hmasa ber atan Thawhṭanni khan eptu MLA pahnih chuan Governor Ganga Prasad-an budget session hawnnaa Hindi-a thu a sawi duh lohna an lantir hnuah Khasi ṭawng an hmang.

Meghalaya state Assembly-ah hian Khasi, Garo leh English hi official language a pawm a ni a, English hi an hriattiam tlanglawn ber a nih avangin English hlir hi an hmang ṭhin a ni.

Speaker Donkupar Roy chuan Thawhṭanni khan eptu MLA-te hi anmahni ṭawng hman a phalsak a, Congress MLA Ampareen Lyngdoh leh Khun Hynniewtrep National Awakening Movement (KHNAM) legislator Adelbert Nongrum-te chuan Speaker phalna lain Khasi ṭawngin thu an sawi a ni.

Speaker chuan an ṭawng hrethiam ve lote hnenah English-a an thusawi lehsa pek an ni dawn tih a sawi hnuah Khasi hian thu an sawi a, Congress MLA hi Zirtawpni khan Governor in Hindi-a thu a sawi avangin House aṭang hian a lo chhuak tawh bawk.

Congress MLA in Khasi ṭawnga thu a sawi zawh hnuah hian KHNAM legislator Adelbert Nongrum pawhin Khasi in thu a sawi ve nghal a, a hrethiam lo te hnenah English in ṭawng lehsak tho mah se rorel lai National People’s Party legislator-te chuan ṭha an ti lo hle thung.

NCP legislator Saleng A Sangma chuan inunauna chu zawi zawia a bo mek thu sawiin House-ah inhriatthiam lohna awm chu a pawi a tih thu a sawi.

Chief Minister Conrad Sangma chuan English-a ṭawng nuam ti zawk tan chuan English hman zel phal a nih thu leh House-ah chuan English hman hi ṭha tih ber thu a sawi.

Khasi ṭawng hmangtu Ampareen Lyngdoh chuan Constitution eight scheduled-a Khasi ṭawng telhna turin pen khata hmasawnna a awm thu a sawi ve thung.

Meghalaya-ah hian Khasi ṭawng hmang mi maktaduai 1.6 vel an awm a, Assam leh Meghalaya inrina vela awm, Assam khaw te pawhin an hmang a, Bangladesh hmun ṭhenkhatah pawh hmag an awm bawk a ni.