Tripura cabinet tilian, minister pathum dah belh

Tripura chief minister Biplab Kumar Deb chuan Thawhlehni khan a cabinet tilianin, minister hmun ruak pali la awmah pathum a dah belh.

MLA pathum - Sushanta Chowdhury, Ram Prasad Paul leh Bhagaban Das-te chu council of minister-ah hlan kai niin, Tripura governor Satyadev Narayan Arya chuan rinawmna thu tiam tirin a la lut a ni.

Kum 2019, March thlaa BJP-IPFT ṭangrual sorkar a din hnuah, CM hian cabinet a tihlenna hmasa a ni. CM chuan minister lakluh tharte hi ṭhalai tak vek an nih thu sawiin, sorkar hmalakna tihpuitlinna kawngah cabinet pawh an tichak hle dawn a ni, a ti.

Minister atana lakluh thar zinga mi Sushanta Chowdhury hi kum 41 mi niin, MLA a nih ṭum khatna a ni. CPIM hruaitu leh ṭum nga MLA lo ni tawh, Manik Dey a hneh a ni. Kum 2017 khan Trinamool Congress aṭangin BJP hi a zawm a ni.

Kum 55 mi, Ram Prasad Paul pawh MLA a nih ṭum khatna a ni bawk a, RSS thawhpuiṭha tak niin CPIM leh an party, BJP hruaitute ngei pawh langsar taka sawisel fo a ni. Tun hnaiah party hruaitu ṭhenkhat lungawi loten Delhi-a central hruaitute an hmuh ṭum pawh khan a tel.

Bhagaban Das pawh hi MLA term khatna a ni a, RSS-ah inhmangin Unakoti district president a ni ṭhin. Kum 2018 inthlan dawna affidavit thehluh aṭanga a lan danin, MLA rethei ber zingah a tel a, Rs 1,97,619 hu a nei a ni.

Chief Minister chuan a cabinet minister-te chanvo a siksawi nghal a ni. CM hian Home (excluding jail and fire and emergency service) Health and Family welfare, PWD (excluding DWS), Industry and commerce and IT, General Administration, Election-te a chang zui dawn a ni. Ministry tihlen a nih hnuah, Tripura-ah hian CM tiamin minister 11 an awm ta a ni.