PM Modi-a'n Assam puih tiam

Prime minister Narendra Modi chuan Assam chief minister Himanta Biswa Sarma biain, an state-in tuilian an tawrh mek chungchangte a zawt a, an harsatna tawhah sorkar laipui chuan a theih anga a puih tur thu a hrilh.

Assam tulian hian district 22-a mi nuai 5.7 chuangte a nghawng buai mek a, tuilian vangin mi pathumin nunna an chan tawh bawk.

PM Modi chuan Assam CM a biak chungchang hi Thawhlehni khan a twitter-ah tarlangin, tuilenna biala awmte an himna tura an theih anga puih an inhuam thu pawh a sawi a ni.

State Disaster Management Authority-in a tarlan danin, tuilian hi Nalbari district chuan an tuar nasa ber a, Darrang leh Lakhimpur district-ah pawh an buai hle tih an sawi.

Tuilian hi thingtlang khaw 1,278 in an tuar a, thlai chinna ram hectare 39.831.91-a zau a chim chhe tawh bawk. Marigoan district-a thingtlang khaw 187 chu tuilianin a chim a, Lakhimpur-ah khaw 138 leh Barpeta-ah 131 a chim bawk.

Thuneitute chuan tuilian tuarte awmna turin relief camp 105 an siam tawh a, heng hmunah hian mi 4,009 awmin an zingah hian naupang 680 an tel.

Barpeta, Cachar, Golaghat, Majuli, Morigaon leh Nagaon district-ah kawngpui 50 vel a chhia a, Barpeta district-ah lei pakhat a chhe bawk a ni.