Assam : BJP MLA in Assam CM hlui lakah thubuai thehlut

Assam-a Bharataya Janata Party (BJP) MLA Pijush Hazarika chuan Thawhlehni khan Assam Chief Minister hlui lakah thubuai a thehlut. Gogoi hian Assam Finance Minister Himanta Biswa Sarma chu pawisa khawih chingpenna leh pawi­khawihnaah a inrawlh nia a puh avangin Hazarika hian lakah complaint hi a thehlut a ni.

Assistant Commi­ssioner of Police (Dispur) Sujit Saikia chuan Gogoi lakah complaint thehluh a nih thu hi a tichiang tawh a, Gogoi-an New Delhi-a press conference-a Sarma chungchang a sawi hi a dik a nih chuan amah Gogoi pawh hian vawi eng emaw zat Sarma hi a pawikhawihna aṭangin a chhanchhuak tihna a ni, a ti. Saikia chuan case chu register a nih loh thu a sawi.

Saikia chuan case chu register tum a nih thu leh, camplaint-a inziak lang case ho hi a hmaa hmun hrang hranga register an nih tawh hlawm avangin Dispur Police Station-ah register a harsat thu a sawi bawk.

Hazarika chuan Gogoi-an chief minister a nih hnuah office zah­awmna vawng tura thu a tiam thu leh constitutional values vawng­him tura thu a tiam thu a sawi.

Gogoi chuan kum 15 chhung Congress sorkarna hnuaia hna thawk Sarma dik lohna a sawichhuah thu sawiin, a thusawi hi a dik a nih chuan Gogoi pawh hian thil a ti dik lo ve thei nia sawiin constitution hlutna a venghim lo niin a sawi. Pawikhawihtu nen an thuhmun reng a ni, a ti.

Kar liamta khan Sarma hian Gogoi chu House-ah Assam Assembly-ah midang chung­chang a sawina chhanletna ngaihtuah tawh ngai loah puhin, ‘hit-an-run’ policy kalpui ṭhin niin a puh a, hemi hnu lawkah hian Gogoi hian New Delhi-a press conference-ah Biswa Sarma chu a thil tihsual tam takah a hum tih a sawi ve leh thung.

Gogoi chuan Sarma chu AASU aṭanga TADA case a neih laka inhumhimna zawnga Congress a zawm thu sawiin, Saradha ponzi scheme case leh Louis Berger bribery case aṭanga himna zawngin BJP a zawm leh thu a sawi. CM hlui chuan cheng vaibelchhe 1, 000 chuang senna North Cachar Hills scam aṭang pawhin Sarma hi a chhanhim niin a sawi bawk.