Meghalaya-ah khawvela sandstone Cave sei/ thuk ber hmuchhuak

Khawvela sandstone cave sei /thuk ber Meghalaya-ah hmuhchhuah a ni a, he pûk huk zawng hi metre 24,583 niin tlang hnuaiah hmuhchhuah a ni.

Pûk hming hi 'Krem Puri' tih a ni a, a pûk tak hi chu 2016 daih tawh khan an lo hmuchhuak tawh a, a thuk zawng erawh hi chu Meghalaya Adventurers’ Asso­ciation (MAA)-ten February 5 aṭanga March 1 chhung khan teh in pûk awmdan te hi an zirchiang tih MMA founding member Brian Daly Kharpran chuan a sawi.

Krem Puri hi khawvela sandstone cave thuk ber record siam lai, Cueva Del Saman in Edo Zulia, Venezuela aiin metre 6, 000 chuang laiin a thuk zawk a, Cueva Del Saman in Edo Zulia hi metre 18, 200-a thuk a ni thung.

2002 kuma Tenzing Norgay National Adventure Award lo dawng tawhtu Kharpran chuan Krem Puri chu India ram chhunga pûk awm zingah pawh, general category-ah chuan a thuk ber dawttu a nih thu sawiin Jaintia Hills ami tho limestone Krem Liat Prah-Umim-Labit chu a phak lo niin a sawi.

Krem Puri hi East Khasi Hills district- Mawsynram area-a Laitsohum thingtlang khaw bula awm a ni a, paleontologists (tunhma a thil nung awm ṭhin zirtu bik)-te mit la tak tak pawh hmuh tur a awm nual a ni.

Pûk chhungah hian dinosaurs, a bikin Mosasaurus fossils-te pawh hmuh tur a awm niin report chuan a sawi a, Mosasaurus-te hi kum maktaduai 66-67 liamta vela khawvela awm ṭhin niin scientist-te chuan an sawi.

Pûk zawnchhuah hna thawktu leh a thuk zawng bakah pûk zirchiangtu, expedition team-ah hian UK, Ireland, Austria, Romania, Switzerland, Poland, the Netherlands, MAA member-te leh Italian scientists, La Venta mi pali an tel a, an vai hian mi 30 vel an ni. 'Krem' tih hi Khasi ṭawng niin pûk tihna a ni a, pûk enfiah tur hian scientist-te hi sawm an ni.

Krem Puri bula khua Mawsynram hi ruahtui tlak nasatna hmun niin, khawvela hmun hnawng ber a ni nghe nghe.

Kharpan chuan ni 25 chhung pûk enfiahna an neih chhung hian a map pawh an siamkim hman viau tih sawiin tlem azawng erawh an zo hman lo tih a sawi a, 1992 aṭanga pûk zirchianga hun hmang tawh Kharpan chuan tunhnaiah pûk pakua an zirchian tawh thu a sawi bawk.

Meghalaya-ah hian pûk 1, 650 vel awm nia hriat a ni a, heng puk te hi an awmna hmun pawh zawnchhuah tawh hlawm niin 1, 000 vel hi chu uluk taka zirchian an ni tawh a ni.