Hmarchhak mi 9 in Padma Shri Award dawng
India rama civilian chawimawina sang, Padma Shri award dawngtu zingah hmarchhak mi pakua an tel a, heng zingah hian world champion weightlifter, social worker, educationalists, writers, journalist, weaver, Gandhian, tennis star hlui leh children’s author-te an tel.
Padma Award pathum - Padma Vibhushan, Padma Bhushan leh Padma Shri award-te hi ramchhunga civilian chawimawina pek ṭhin an ni. Kumtinin heng chawimawina te hi India President in Rashtrapati Bhavan-ah March emaw April thlaah emaw a hlan ṭhin.
Kumin hian Padma award dawngtu hi mi 84 an awm a, Padma Vibhushan dawngtu pathum, Padma Bhushan pakua leh Padma Shri 72-te sem chhuah a ni.
President Ram Nath Kovind chuan Marh 20 khan New Delhi-ah award tam zawk hi a hlan tawh a, hemi nia hlan loh te hi April 2 hian hlan an ni leh dawn thung.
Hmarchhak aṭanga Padma Shri Awardee awm te chu :-
Puitling tana lehkhabu 16 leh adventure novel 17 ziak tawhtu Assam mi Arup Kumar Dutta, Nagaland-a Mokokchung district-a kum 10 chuang lai Gandhi Ashram-a hun hmang tawh Lentina Ao Thakkar, Tennis star ni ṭhin Tripura mi Somdev Devvarman, Literature leh Education lama a hnathawh avanga hriat hlawh tak Nagland mi Piyong Temjen Jamir, Literature leh Education lama a hnathawh avanga hriat hlawh tak tho Mizoram mi A Zakia leh, Literature leh Education lama a hnathawh mai bakah Journalism-a a contribution avangin Assam mi Prafulla Govinda-te chu hlan an ni.
Rashtrapati Bhavan-a chawimawina hlan an nih lai hian Vice-President M Venkaiah Naidu, Prime Minister Narendra Modi bakah minister pawimawh mi eng emaw zat an tel bawk.