Meghalaya-ah RTI Activist that

Meghalaya-a Right to Information activist lar tak Poipynhun Majaw chu thah a nih tih Police ten Thawhlehni khan an sawi.

Majaw hi Jaintia Hills Autonomous District Coun­cil (JHADC)-a van­tlang pawisa tur khawih­ chingpen a nih chungchang haichhuaktu a ni a, Jaintia Youth Federation (JYF) Pre­sident ni lai mek a ni bawk.

Police-te chuan Thawh­lehni zing khan a ruang hi East Jaintia Hills district headquaters, Khlehriat-a lei hnuaiah chhar a nih thu an sawi.

Thawhṭanni zana East Jaintia Hills Deputy Commissioner office bula motorcycle a khalh lai hmuh a ni chu a damlai hmuh hnuhnun ber a nih thu report chuan a tarlang.

Deputy Inspector General of Police A.R. Mawthoh chuan a ruang bulah wrench chhar a nih thu a sawi a, wrench hmang hian a lu ah chhut hlum a nih an rin thu a sawi bawk.

Majaw hian hian JHADC scam mai bakah Jaintia Hills-a cement company ṭhenkhatin Council phalna loa hna an thawh thu pawh a lo haichhuak tawh a ni.

Civil Society Wo­men’s Organisation (CSWO) President Agnes Kharshing chuan Majaw thah a nih chu an dem thu sawiin pawikhawihtu zawnchhuah thuai an phut thu an sawi.