Sikkim CM in Sushma hnenah Karmapa zin phalna dil

Sikkim Chief Minister Pawan Kumar Chamling chuan Thawhlehni khan External Affairs Minister Sushma Swaraj hnenah lehkha thawnin Karmapa 17-na, Ogyen Trinley Dorje-an Sikkim a tlawh phalsak turin a dil.

17th Karmapa hi kum 900-a upa, Karma Kagyu thlah kal zela an hotu ber a ni a, 2000 kum khan Tibet aṭanga tlanchhuakin India ram chhunga Gyuto monastery-ah a cheng mek a ni. India sorkar chuan buaina thleng thut thei laka inven thawn nan Karmapa hian Sikkim a tlawh hi an phalsak lo thung.

Chaming chuan Sushma Swaraj hnena lehkha a ziah thu leh 17th Karmapa-an Sikkim a tlawh ngei theihna tura hmalak pui tura a ngen thu a sawi. 17th Karmapa Ogyen Trinley Dorje-an Sikkim-a monastery emaw Rumtek Monastery emaw a tlawh a, mipuite mal a sawmsak chu a duh thu a sawi.

17th Karmapa-an Sikkim a tlawh chu Sikkim mipuite leh state sorkar duhthusam a nih thu Chief Minister chuan a sawi.

Rumtek monastery bak­ah Himalayan state-a mo­nastery-ah te a dinhmun diktak luah tura 17th Karmapa-an Sikkim a tlawh theih nan Chamling hian sorkar laipui hi hmin a tum hle a ni.

2016 khan hemi chungchanga sorkar nawr nan hian Rumtek monastery-a puithiam 100 chuang chuan ni 500 chhung chaw ngheia nawrh an lo huaihawt tawh nghe nghe a ni.

Nikuma Union Home Minister Rajnath Singh-an Sikkim a tlawh ṭum pawh khan hemi chungchang hi puithiam te hian an lo sawipui tawh a, mahse hemi issue-a China dinhmun avangin tun thleng hian sorkar laipui chuan Karmapa-an Sikkim a tlawh hi an la phal lo thung.