Assam-a sorkarin National Park hming aṭangin Rajiv Gandhi hming a paih dawn

Sorkar laipuiin Khel Ratna Award hming aṭanga Rajiv Gandhi hming a paih hnuah, Assam sorkar pawhin Orang-a Rajiv Gandhi National Park hming chu thlakin Rajiv Gandhi hming a paih ve leh dawn.

State cabinet chuan Rajiv Gandhi National Park tih chu Orang National Park-a thlak turin Nilaini khan resolution a pass. He park hi India rama Royal Bengal Tiger awm tamna hmun zingah a tel.

Assam sorkar chuan thuchhuah siamin, Adivasi leh Tea tribe community-te ngenna leh duhdan angin, cabinet chuan Rajiv Gandhi National Park tih chu Orang National Park tia thlak a remti a ni, a ti.

National Park hi Darrang, Udalguri-a Brahmaputra lui hmarlama awm a ni a, Royal Bengal Tiger bakah Rhino, Pymy Hog, wild elephant leh wild water buffalo-te an awm avangin hriat pawh a hlawh hle. Park hi square km 72.28-a zau niin, kum 1985 khan wildlife sanctuary-ah puan a ni a, kum 1999 khan national park-ah puan leh a ni.

Kum 1992 khan Orang Wildlife Sanctuary chu Rajiv Gandhi hming chawiin phuah a ni a, kum 2001 khan Tarun Gogoi kaihhruai Congress sorkar chuan Rajiv Gandhi National Park tia vuah chhunzawm a nih thu a puang a ni.