Meghalaya CM-in loneitute puala FOCUS programme siam a hawng

Meghalaya chief minister Conrad K Sang­ma chuan Nilaini khan East Garo Hills-ah loneitute puala siam, Farmer’s Collectivisation for Upscaling Production and Marketing Systems (FOCUS) programme a hawng.

State sorkar flagship programme, FOCUS chu loneituten an thlai thar an zawrh chhuahna kawnga puitu tur leh, sum lama puih an nihna tura duan anih thu Chief Minister chuan a sawi. State mipui 70% vel chu loneia eizawnga an ni tih sawiin, sorkarkin welfare scheme hrang hrang a siam bakah FOCUS programme kaltlang hamṭhatna an dawng thei dawn a, sorkarin agriculture sector tihhmasawnna tura hmathlir a neihte nen pawh tihhlawhtlin chhohna tur a nih thu a sawi.

FOCUS programme kaltlangin sorkar chuan loneitute tan an thlai thar chhuah zawrh chhuahna remchang leh ṭha zawk a siamsawk dawn a, loneitute chu 'Producers Group' angin programme hmang hian sum lama puihna pawh pek an ni ang, a ti.

"Mimal ang chuan harsatna hrang hrang a awm thei a, hei vang hian loneitute chu intelkhawm a, producers group anga a awm chuan scheme hnuaia hamṭhatnate hi an dawng thei dawn a ni," tiin loneitute chu Producers Group siam turin a chah nghal bawk.

CM chuan he prog­ramme hnuaiah loneitu tinte chu Rs 5,000 pek an ni dawn a, mahse producers group-ah an tel erawh a ngai dawn tih a sawi. Producers group hnena sum pek chu loan ni loin, an hnathawhna atana puihna a ni tih a sawi. FOCUS programme atan hian cheng vaibelchhe 200 ruahman a nih thu a sawi bawk a ni.