Assam Congress-in TMC leh CPM thawhpui tum lo

All India Congress Committee (AICC) Tripura in-charge Dr Ajay Kumar chuan Trinamool Congress leh CPI(M) thawhpui an tum lo tih sawiin, kum 2023 state assembly inthlanah Congress party chuan hnehna a chan ngei a rin thu a sawi.

Nilainia Agartala-a Congress Bhawan-ah chanchinthar lakhawmtute kawmin, Dr Kumar chuan TMC leh communist party nena thawhho an tum lo thu hi a sawi a, hemi rual hian Padyot Kishore Manikya Debbarma kaihhruai TIPRA Motha erawh thawhdunna kawng a inhawng thei niin a sawi thung.

Kumar chuan Congress leh TIPRA Moha chuan agenda in ang tam tak an nei tih sawiin, a bikin tribal-te thuneihna sang zawk leh thuam chakte chu an duh ve ve tih a sawi. Tripura-a rorellai, BJP chuan inthlan hmaa a thu tiamte a tihlawhtling lo tih sawiin, BJP chu state mipuite inkara inhuatna thlen tuma cheah a puh.

BJP sorkar hnuah chief minister CPI(M) hruaitu Manik Sarkar, state Congress president Pijush Kanti Biswas, state Congress hotu hlui Birajit Sinha leh eptu party hruaitu dangten politics thil avangin beih an tawk tawh tih Kumar chuan a sawi. State mipuite chuan BJP hnuaiah eirukna, tharum thawhna leh inthliarna thleng fo chu an ning tawh a, hruaitu thlak an duh tawh a ni, a ti.