HIV vei zat rate sang ber Manipur

Nagaland State AIDS Control Society (NSACS) official chuan Nagaland chu HIV vei zat rate san lamah ramchhungah pathumna a nih thu a sawi a, Manipur chu sang ber a nih thu sawiin Mizoram in a dawt niin a sawi.

Nagaland bikah hian HIV’ (PLHIV) leh AIDS vei hi mi 22, 878 an awm a, puitling zingah 0.76% in an vei tih a sawi bawk.

NSACS Deputy Di­rector Vezokholu Theyo chuan Nilaini khan 1999 aṭanga 2018 chhunga zir­chiannaa a lan danin ram chhungah HIV vei awm zat rate hi Manipur-ah a sang ber a, puitling zingah a rate hi 1.06% a nih thu a sawi a, Mizoram in dawtin 0.79% a ni thung tih a sawi.

Theyo chuan Nagaland-ah HIV vei zat rate a tlakhniam thu sawiin chu chu thu lawmawm tak a nih thu a sawi bawk.

Ram pumpuiah PLHIV case nuai 21.1 a awm thu sawi­in heng zinga 82%-te chu Andhra Pradesh, Maharashtra, Karnataka, Gujarat, Uttar Pradesh, Bihar, Tamil Nadu, West Bengal leh Rajasthan mi te an nih thu a sawi a ni.

Nagaland bikah hian mihring nuai 20 vel an awm thu sawiin, 199-2018 inkarah hian thisen 10,16,700 test a ni a, heng zinga 22,878 chu HIV positive an ni tih hmuchhuah a nih thu a sawi. Positive zinga 91% hian sex aṭanga an kai a nih thu sawiin, kum 25 aṭanga 34 inkarah a hluar zual hle tih a sawi bawk.

Naupang kum 14 hnuai lam zingah Nagaland bikah hian a vei awm zat rate hi 6% a ni a, kum 15-24 inkar­ah 15% niin, positive tih hriatchhuah zinga 16713-te chu Anti Retroviral Therapy (ART) la tura an in register thu a sawi. Zirchianna an neih chhung hian mi 1504 in an thihpui thu a sawi bawk a ni.