State sorkar in Naga Political Issue chinfel ngaipawimawh : Governor

Nagaland Governor PB Acharya chuan Ningani-a Nagaland Assembly-a thu a sawinaah Nationalist De­mocratic Progressive Party (NDPP) kaihhruai Peo­ple’s Democratic Alliance (PDA) chuan Naga buaina chinfel chu a ngaihpawimawh ber zinga mi a nih thu a sawi.

Governor chuan buaina chinfelna atan state sorkar chu stakeholder-te nen an thawh ho dawn thu a sawi a ni.

State sorkar chu buaina chinfelna dal zawngin a awm dawn loh thu a sawi a, Naga mipuite pawh an ṭanrual a ṭul thu a sawi bawk.

Acharya chuan state-a sorkarna siam mek tute chuan buaina chinfelna zahawm tak, daihrei tak tur leh mipui zawng zawngin an pawmtlan tur an an ngaihtuah chhuak dawn niin a sawi.

Nagaland Assembly Bud­get session hi ni riat chhung chawlh lailawk a nih hnuah Ningani khan chhunzawm leh a ni a, Governor hian thu a sawi nghal a ni.

Sorkar thar kaihhruaina hnuaia a hmasa ber atan March 13 khan a session hi ṭan a ni a, hemi ni hian Chief Minister Rio chuan House-ah majority test a paltlang nghal a, NDPP hruaitu hlun Vikho-o Yhosh chu speaker atan thlan a ni nghal bawk.

Nagaland Assembly member 60 awm zingah hian 15 hi an vawikhat member nihna a ni a, governor chuan member tharte chu a rintawk thu a sawi a ni.

Gobernor chuan sorkar moto chu ‘Together with All, Development for All’a nih a ṭul thu sawiin Prime Minister Narendra Modi ruahmanna ‘Sabka Saath, Sabka Vikaas’nen pawh a inmil niin a sawi bawk.

Chief Minister Neiphiu Rio, finance portfolio chang­tu ni bawk chuan nimin khan 2018-19 budget a pharh rin a ni a, he thu ziah lai hian chanchin kimchang kan la hre hman lo a ni.